Canslo gwyliau pecyn

Gallwch chi ganslo unrhyw bryd cyn i’r gwyliau ddechrau, ond bydd yn rhaid i chi dalu ffi i ganslo fwy na thebyg. Dylai’r ffioedd fod yn y telerau ac amodau. Maent yn debygol o fod yn uwch os yw'n agos at y dyddiad gadael. Cysylltwch â'r cwmni os na allwch chi ddod o hyd i'ch telerau ac amodau.

Dim ond y swm y byddan nhw'n ei golli y dylai'r cwmni ei godi arnoch chi - dylent geisio gwerthu'r gwyliau i rywun arall. Os ydych chi'n meddwl eu bod nhw'n codi gormod, gofynnwch sut wnaethant gyfrifo'r ffi canslo.

Trosglwyddo eich gwyliau

Meddyliwch a allwch chi ddod o hyd i rywun i fynd ar y gwyliau, oherwydd gallai hyn fod yn rhatach na'i ganslo. Rhaid i'r person rydych chi'n trosglwyddo iddo fodloni unrhyw amodau - fel cyfyngiadau oedran.

Ysgrifennwch lythyr neu e-bost at y cwmni yn dweud wrthynt eich bod chi eisiau trosglwyddo'r gwyliau a rhowch fanylion y person arall. Bydd angen i chi wneud hyn o leiaf 7 diwrnod cyn i'r gwyliau ddechrau.

Rhaid i'r cwmni ddweud wrthych chi faint fydd hi'n ei gostio i drosglwyddo’r gwyliau. Rhaid i'r gost honno fod yn rhesymol ac ni all fod yn fwy na'r hyn y mae'n ei gostio iddynt i wneud y trosglwyddiad. Rhaid iddynt ddarparu prawf o'r gost.

Bydd yn rhaid i chi neu'r person rydych chi'n trosglwyddo iddo dalu cost trosglwyddo'r gwyliau. Os nad yw'r person rydych chi'n trosglwyddo iddo yn talu, bydd yn rhaid i chi wneud hynny.

Os yw’r cwmni wedi gwneud ‘newid sylweddol’ i’ch gwyliau pecyn, nid oes rhaid i chi ei dderbyn. Mae gennych yr hawl i naill ai:

• ganslo'r gwyliau heb ffi a chael eich arian yn ôl

• dderbyn gwyliau arall, os oes un

Nid oes unrhyw ddiffiniad o ‘newid sylweddol’, ond mae’n cynnwys:

• newid mawr i brif nodweddion eich gwyliau - er enghraifft os yw'r cwmni'n dweud eich bod chi'n mynd i gyrchfan wahanol i'r un wnaethoch chi ei drefnu

• os nad yw’r cwmni’n bodloni ceisiadau arbennig rydych chi wedi cytuno arnynt gyda nhw ac sydd yn eich contract - fel gofyn am ystafell ar y llawr gwaelod oherwydd cadair olwyn

Dylech chi hefyd weld os gallwch chi gael iawndal.

Mae’n rhaid i’r cwmni roi gwybod i chi am y newid yn ysgrifenedig. Rhaid iddynt wneud y canlynol:

• dweud wrthych chi beth yw'r newid

• dweud wrthych os yw'r pris wedi'i ostwng oherwydd bod y newid yn golygu ansawdd neu gost is

• rhoi amser rhesymol i chi roi gwybod iddynt os ydych chi eisiau canslo

• dweud wrthych os ydynt yn cynnig pecyn gwahanol yn lle hynny a faint mae'n ei gostio

• eich rhybuddio os na fyddwch chi'n ateb ar ôl iddynt gysylltu â chi ddwywaith, gallant ganslo eich gwyliau

Rhaid i chi roi gwybod iddynt erbyn eu dyddiad cau os ydych chi'n derbyn y newid neu os ydych chi eisiau canslo'r gwyliau. Ni fydd yn rhaid i chi dalu ffi i ganslo. Os na fyddwch chi'n ateb mewn pryd, mae'n rhaid i'r cwmni roi gwybod i chi unwaith eto. Os na fyddwch chi'n ateb o hyd, gallant ganslo eich gwyliau.

Edrychwch ar delerau ac amodau’r gwyliau i weld os ydynt yn gadael i’r cwmni gynyddu’r pris. Chwiliwch am rywbeth fel ‘amrywiad pris’ - mae hyn yn golygu y gall y pris newid. Ni allant ei gynyddu os nad yw'r telerau ac amodau yn caniatáu hynny.

Hyd yn oed os yw'r telerau ac amodau'n caniatáu cynnydd mewn prisiau, dim ond oherwydd y canlynol y gall y cwmni gynyddu’r pris:

• cynnydd ym mhrisiau tanwydd sy'n golygu bod costau trafnidiaeth wedi codi

• newidiadau i drethi neu ffioedd gan drydydd partïon - fel trethi twristiaid

• cyfraddau cyfnewid sy'n effeithio ar bris y gwyliau

Mae’n rhaid i’r cwmni roi gwybod i chi’n ysgrifenedig ynglŷn â’u bwriad i gynyddu’r pris. Mae'n rhaid iddynt hefyd roi amser rhesymol i chi ddweud wrthynt a ydych chi'n ei dderbyn neu eisiau canslo. Os ydynt yn cynnig pecyn arall yn lle hynny, mae'n rhaid iddynt ddweud wrthych faint mae'n ei gostio. Os na fyddwch chi'n ateb erbyn eu dyddiad cau, efallai y byddant yn canslo'r gwyliau.

Mae’n rhaid i’r cwmni roi gwybod i chi ynglŷn â'r cynnydd mewn prisiau o leiaf 20 diwrnod cyn i’r pecyn ddechrau ac egluro pam mae’r pris yn codi. Mae gennych yr hawl i ganslo’r gwyliau heb dalu ffi os yw’r cynnydd yn fwy na 8% - fe gewch chi unrhyw arian rydych chi wedi’i dalu’n barod yn ôl.

Os yw'r telerau ac amodau'n dweud y gall y cwmni gynyddu'r pris, mae'n rhaid i'r cwmni hefyd gynnig ad-daliad i chi os bydd cost eich gwyliau'n gostwng oherwydd newidiadau i brisiau tanwydd, trethi neu gyfraddau cyfnewid.

Gallwch chi ganslo eich gwyliau heb orfod talu ffi. Fe gewch chi ad-daliad llawn ond ni fyddwch yn gymwys am unrhyw iawndal.

Mae’n rhaid i’r amgylchiadau eithriadol fod yn eich cyrchfan neu wrth ymyl eich cyrchfan. Rhaid iddynt gael effaith sylweddol ar eich gwyliau neu wrth gyrraedd yno – fel awyrennau’n methu â hedfan yno oherwydd llwch folcanig.

Mae enghreifftiau o amgylchiadau eithriadol yn cynnwys:

• rhyfel

• clefyd difrifol

• trychineb naturiol – fel llifogydd, daeargrynfeydd neu amodau tywydd